Leta ntiyigeze isaba abajejwe intwaro kubomora amazu yubatswe bidakwirikije amategeko, ahubwo yabasavye kwereka abanyagihugu ivyo  bubatse barenze akarimbi maze nabo bakibomorera. Gervais Ndirakobuca, umushikiranganji w’intwaro yo hagati mu gihugu n’umutekano, yabishikirije kuri uyu wa mbere aho yari yagendeye muri karitiye ya Mugoboka, iri muri komine ya Mukaza mu gisagara ca Bujumbura. Abanyagihugu bo muri iyo karitiye bakaba bari bagirije abajejwe intwaro kubabomorera amazu yabo ku karenganyo. Umushikiranganji w’intwaro yo hagati mu gihugu akaba yasize atanze itegeko ko abo babomoye amazu y’abanyagihugu boba bahejeje kuyubaka mu kiringo kitarenze indwi zibiri.