Urunani rw’amashirahamwe adaharanira inyungu za politike FORSC, rurahagaritswe umutima n’ubwinshi bw’abanyeshure mu mashure shingiro amwe amwe yo mu ntara ya Mwaro na Cibitoke. Akarorero FORSC itanga ni ak’ishure shingiro ya Mpumbu, komine Rusaka, y’intara ya Mwaro. Abana 171 biga mu mwaka wa mbere, bakaba bagabuwe mu mirwi ibiri yiga imbere n’inyuma y’umutaga, aho ishure bigamwo ririmwo intebe indwi zonyene. Kubwa Libérat Ntibashirakandi, umuhinga mu bijanye n’indero, ngo birababaje kubona ico kibazo kidatorerwa inyishu kandi kizwi haraheze imyaka itari mike. Akibutsa abarongoye igihugu ko kazoza k’igihugu kava mu ndero y’akanovera.