Itorwa rya Willy Nyamitwe ngo arongore urwego rw’igihugu rujejwe kugenzura uko ibimenyeshamakuru bikora ntirihumuriza ko hari intambwe yoba igiye guterwa mu vyo kwubahiriza ubwigenge bwo kumenyesha amakuru. Uwo ni umwihwezo w’umumenyeshamakuru Franck Kaze. Uwo asanzwe ari umuhinga mu vyo kumenyesha amakuru agafatira ku ngendo yamye iranga Willy Nyamitwe aho atigeze atinya kuvuga ku mugaragaro ko abamenyeshamakuru bakorera amaradiyo yigenga ari abansi b’igihugu. Franck Kaze akamenyesha ko ata wosamazwa n’imvugo Nyamitwe yakoresheje ahejeje gutorwa kuko ari iyo kuryosha amajambo gusa.