Ishirahamwe OLUCOME risaba umukuru w’igihugu gutanga insiguro ku Barundi afatiye ku ngingo afata zihagarika izo aba yafashe mu ntumbero yo kwubahiriza intwaro ibereye. Mw’ikete yarungikiye Evariste Ndayishimiye, Gabriel Rufyiri, arongoye iryo shirahamwe rirwanya ibiturire n’isesagurwa ry’amatungo ya leta, afatira akarorero ku bategetsi yahagaritse ku mugaragaro abahora kuba badashoboye amabanga yabo, mu nyuma bagahabwa ibindi bibanza vy’iteka. Gabriel Rufyiri anibutsa ibijanye n’ugushira ahabona amatungo y’abategetsi b’igihugu. Ku bwiwe, amategeko atari make yarahonyanzwe.