Kw’igenekerezo rya 25 Munyonyo uko umwaka utashe, isi yose irahimbaza umunsi wahariwe kurwanya amabi akorerwa abakenyezi. Umuhari w’abakenyezi n’abigeme baharanira amahoro n’umutekano mu Burundi (MFFPS) ukaba watanguje kuri uyu wa gatanu, isekeza ry’iminsi 16 ryahariye kumenyekanisha no kurwanya ayo mabi. Umushingwamanza Jeanne d’Arc Zaninyana arongoye uwo muhari, amenyesha ko amabi akorerwa abakenyezi abandanya yiyongera mu Burundi. Akaboneraho gusaba ubutungane ku bakorewe ayo mabi. Abayakorewe na bo, ngo nibareme, impera n’imperuka ababikoze bazobihanirwa.