Hari akarwi k’abafata ingingo kakiboheye Evariste Ndayishimiye amaboko i mugongo. Ivyo bigatuma umukuru w’igihugu bimugora gushira mu ngiro ingingo aba yafashe. Bisigurwa na Léonidas Hatungimana, umukuru w’umugambwe PPD Girijambo, yahoze ari n’umuvugizi wa nyakwigendera Pierre Nkurunziza. Léonidas Hatungimana akaba yaranabanye na Evariste Ndayishimiye mu mugambwe CNDD-FDD. Ivyo rero akaba abivuga afatiye ku ngingo zifatwa, nk’aho hari abo akura agasubira kubashinga ayandi mabanga ahanitse, ngo biva ku gutinya ahanini ko hari amabanga amenwa n’abo baba bakuwe. Ngo hamwe umukuru w’igihugu Evariste Ndayishimiye yoba yipfuza guhinduka, bizomusaba kwiheba akegezayo abo bose bamubuza gushika ku vyo adasiba kuvuga.