Urunani rw’amashirahamwe aharanira agateka ka zina muntu mu Burundi (CBDDH) rurasaba ubutungane ku bwicanyi bwagiriwe Ernest Manirumva, yahoze ari icegera c’uworongoye ishirahamwe ryishinze kurwanya igiturire n’isesagurwa ry’amatungo ya leta OLUCOME. Imyaka 13 iraheze Ernest Manirumva agandaguwe. Mw’itangazo urwo runani rwasohoye ku munsi wa gatandatu uheze, ruratangazwa n’ingene ubutungane bw’Uburundi buriko bukorera mu kwaha kw’ubutegetsi, kuri iyo dosiye. Umushingwamanza Vital Nshimirimana arurongoye, agasaba leta kutivanga mu vy’ubutungane, kugira ukuri kumenyekane.