Abahoze bari mu rwego nshingantwro babiri rw’ibitaro Kira Hospital bari basanzwe baserukira umunyamitahe mukuru Swissmed International Ltd, baremeza mu nyandiko y’uko batanze imihoho mu mabanga yabo muri urwo rwego, kubera iterabwoba bagiriwe n’abategetsi b’igihugu. Mw’ikete bashize ahabona kw’igenekerezo rya 16 Myandagaro umwaka w’2022, bamenyesha ko ivyo bavuze, banditse canke ivyo bakoze kuva kw’igenekerezo rya 31 Ntwarante, ari impfagusa, kuko vyose babikoze bashaka gukiza agatwe. Ku bw’umushingwamanza Gustave Niyonzima, ibiri muri iryo kete vyerekana ko ibijanye n’ipfungwa rya muganga Christophe Sahabo birangwa n’ihonyangwa ry’amategeko.