Amanota yafatiweko ku banyeshure bize amashure y’akarorero, bipfuza kwinjira muri kaminuza mu gisata c’Ubuvuzi ni 73.11% hamwe na 75.82% mu bize ku yandi mashure. Vyamenyeshejwe n’umushikiranganji w’Indero mu kiganiro n’abamenyeshamakuru kuri uyu wa kabiri. François Havyarimana yarongeye aramenyesha ko ku banyeshure 100 bitezwe muri ico gisata c’ubuvuzi muri kaminuza y’Uburundi, 40 bize amashure y’akarorero, ivyo abahinga mu bijanye n’indero banegura, bakabibonamwo ikumira mu bijanye n’ukuronswa ubumenyi bw’abana b’igihugu.