Inyuma y’aho ishirahamwe REGIDESO ryinjirije ibitoro mu gihugu, n’ubu kiracari ikibazo kugira ama stasiyo ashobore kukironka. Nko mu gisagara ca Bujumbura, ku ma stasiyo 20 yo muri komine ya Mukaza, 3 yonyene ni yo yariko aratanga ibitoro kuri uyu wa gatatu, muri komine ya Muha ku ma stasiyo 17, 4 yonyene ni yo yariko arabitanga, amwe akagira essence gusa canke mazout gusa, mu gihe muri komine ya Ntahangwa, ama stasiyo 5 ari yo yariko aragitanga ku ma stasiyo 24 agize iyo komine. Bene ama stasiyo bakavuga ko ikibazo ari amafaranga yo kugikura i Gitega bagishikana i Bujumbura, bamwe bagahitamwo kutakirangura.