Uburundi ntibwigeze butera intambwe mu bijanye n’ubutunzi kuva bwikukira. Ni umwihwezo w’ishirahamwe ryishinze gukangurira Abarundi guhindura ingendo (PARCEM). Faustin Ndikumana, arongoye iryo shirahamwe, insiguro atanga kuri ico kibazo, abona ko vyavuye ku ndyane za politike igihugu cagumye gicamwo mu myaka 60 iheze. Kugira Uburundi butere imbere mu butunzi, ishirahamwe PARCEM riratanga ingingo cumi ngenderwako. Aho hakaba harimwo umubano mwiza hagati y’abonse rimwe biciye mw’iyubahirizwa ry’amasezerano ya Arusha hamwe n’ishirwaho ry’intumbero itomoye mu bijanye n’ubutunzi.