Abantu babiri bo muri komine Gitobe mu ntara ya Kirundo barafunzwe kuva ku mugoroba wo kuri uyu wa kabiri. Ernest Mbazumutima, arongoye umugambwe CNL muri komine Gitobe na Népomucène Ndungutse, arongoye umugambwe CNL ku mutumba wa Gahosha muri iyo komine nyene, bakaba bafungiwe mu busho bw’intara na komine. Abandi banywanyi ba CNL bari bafunzwe kubera bagiye gusuhuza Népomucène aho afungiwe bahavuye barekurwa ariko igipolisi kikaba caciye kibaka telefones ngendanwa zabo. Abanywanyi b’umugambwe muri iyo ntara bakaba babona ko ari agatotezo bariko barakorerwa mu gihe haboneka n’ugushaka kunyuruza bamwe muri bo.