Abantu babiri barishwe abandi bane barakomereka kubera grenade yatewe muri zone Gatumba, komine ya Mutimbuzi iri mu ntara ya Bujumbura, hari mw’ijoro ryo kuri uyu wa kabiri. Uwikekwa ko yakoze iryo bara nawe nyene yaciye yicwa igihe yariko aragerageza guhunga. Iryo terwa ry’ama grenade mu banyagihugu ataco bazira rirahagaritse umutima umukuru w’urunani CFOR-Arusha ruhurikiyemwo abatavuga rumwe na leta, aho asaba umukuru w’igihugu ubwiwe gufata ingingo ruhasha zikingira abanyagihugu. Frédéric Bamvuginyumvira akibaza nyabuna ko abari inyuma y’iterwa ry’ayo ma grenade boba bacuditse n’ubutegetsi.