Inzira iracari ndende mu Burundi kugira intwaro rusangi itsimbatare mu gihe bimwe mu biyigize bihonyangwa ku mugaragaro. Frédéric Bamvuginyumvira, arongoye urunani rwa politike rutavuga rumwe na leta CFOR-Arusha, abona ko intambwe ya demokrasi yasubiye inyuma gushika n’aho hagaruka umugambwe umwe. Akaba abivuze kuri uyu munsi mpuzamakungu wahariwe intwaro rusangi uhimbazwa ku wa 15 Nyakanga uko umwaka utashe kuva mu 1997. Kubwa Bamvuginyumvira, iyubahirizwa ry’inkingi z’intwaro rusangi iracari kure nk’ukwezi.