Abanyagihugu bo muri komine Kayanza basabwa gushira hamwe amatongo yabo bakarimira hamwe kugira vyorohe ko abafundi b’indimo babafasha. Remy Cishahayo, Buramatari w’intara ya Kayanza, yabateye ako kamo kuri uyu wa gatandatu igenekerezo ry’7 Myandagaro aho yari yagiye guhimbariza umunsi mukuru w’amakomine muri iyo komine ya Kayanza. Buramatari Remy Cishahayo akaba yababwiye ko atari umugambi wo kubanyaga amatongo kuko n’aho borimira hamwe, akarimbi kabo kazogumaho.