Kuri uno munsi wa kabiri itariki 08 Ruheshi, ni ubwa mbere hahimbazwa umunsi wagenewe umuhisi Petero Nkurunziza nk’imboneza yamaho mu vyo gukunda igihugu. Uwo munsi ukaba wabaye uw’akaruhuko ku bakozi. Ukaba washinzwe n’itegeko ry’umukuru w’igihugu mu ndwi iheze. Petero Nkurunziza yarangwa n’ubutwari, ubwira, gukunda ineza y’igihugu hamwe n’umutima wo kwemera kucitangira. Ivyo ni ibivugwa na Evariste Ndayishimiye, umukuru w’igihugu c’Uburundi, yanagendanye na Petero Nkurunziza. Akamenyesha ko ivyo arivyo vyatumye agenda yizigirwa mu mabanga atandukanye, gushika n’aho Abarundi bamutora nk’umukuru w’igihugu.