Gufunga abantu hadakurikijwe amategeko birabandanya mu Burundi. Indwi iraheze umunyagihugu ari kw’izina rya Jean Damascène Nguvumari wo muri komine Mutimbuzi, zone Maramvya, yarafunzwe atazi ico yagirizwa. Uyo munyagihugu yafashwe inyuma yaho yari aje ava mu gihugu ca Afrika y’epfo, igihugu  amazemwo imyaka 3. Pacifique Nininahazwe, arongoye ishirahamwe FOCODE, akaba yanatanguje umugambi Ndondeza, avuga ko Jean Damascene Nguvumari yafashwe mu rugo iwe n’abagize igipolisi hamwe n’Imbonerakure. Pacifique Nininahazwe agasaba leta y’Uburundi ko yokora ibishoboka kugira ngo ugufunga kudakurikije amategeko bihagarare.