Hari intwazangabo yo mu gipolisi iri mu munyororo kuva mu kwezi kwa Kigarama kw’umwaka uheze, bivuye ku mirwi ibiri y’Imbonerakure yatanye mu mitwe. Lieutenant-colonel Jean Bosco Havyarimana yari arongoye umwe muri iyo mirwi. Hari mu gihe yari agiye gutabara barumuna we bariko bakubagurwa n’uwundi murwi w’Imbonerakure wari urongowe na Janvier Hakizimana, batazira Bébé. Ivyo vyabereye mu Gatunguru, mu gisagara ca Bujumbura. Uwo mupolisi rero n’urwo rwaruka bari kumwe, bikavugwa ko bakubise uwo murwi wundi urashaya. Pacifique Nininahazwe, arongoye ishirahamwe FOCODE, akaba amaze iminsi ariko aratohoza ku vyabaye. Uwo aharanira agateka ka zina muntu akaba anegura ububisha Imbonerakure zikora, n’agacerere k’ubutegetsi kuri ayo mabi.